ایران پر حالیہ حملوں کے بعد خطے کی صورتحال مزید کشیدہ ہوگئی ہے، جس پر لبنان کی قیادت نے بھی واضح اور محتاط مؤقف اختیار کرلیا ہے۔
لبنان کے وزیراعظم نواف سلام نے موجودہ حالات پر ردعمل دیتے ہوئے کہا ہے کہ لبنان کو کسی بھی قسم کی غیر ذمہ دارانہ مہم جوئی یا بیرونی تنازع میں الجھنے نہیں دیا جائے گا۔ ان کا کہنا تھا کہ قومی مفاد، سلامتی اور داخلی استحکام ہر صورت مقدم رکھا جائے گا۔
یہ پڑھیں میاں بیوی کو سزائے موت، ویڈیوز 47 ممالک تک پھیلانے کا انکشاف
وزیراعظم نے بالواسطہ طور پر حزب اللہ کو مخاطب کرتے ہوئے زور دیا کہ ملک کو علاقائی کشیدگی کا حصہ بنانے سے گریز کیا جائے۔ انہوں نے واضح کیا کہ لبنان اس وقت نازک معاشی اور سیاسی حالات سے گزر رہا ہے، ایسے میں کسی بھی قسم کی محاذ آرائی ملک کے لیے نقصان دہ ثابت ہوسکتی ہے۔
نواف سلام نے مزید کہا کہ لبنان کی خودمختاری، قومی اتحاد اور سلامتی پر کوئی سمجھوتہ نہیں کیا جائے گا اور حکومت ہر ممکن اقدام کرے گی تاکہ ملک کو علاقائی تنازعات کے اثرات سے محفوظ رکھا جا سکے۔
علاقائی تجزیہ کاروں کے مطابق ایران پر حملوں کے بعد مشرق وسطیٰ میں تناؤ بڑھنے کا خدشہ ہے، جس کے باعث لبنان سمیت دیگر ممالک محتاط سفارتی پالیسی اختیار کر رہے ہیں۔
