ملتان میں نماز فجر کے دوران سیکیورٹی ہائی الرٹ، سی پی او کا ہنگامی دورہ

ملتان پولیس شہریوں کے تحفظ کے لیے الرٹ

ملتان (ساجد نذیر سے)  صادق علی ڈوگر، سی پی او ملتان نے شہر بھر میں مساجد کے دورے کرتے ہوئے نمازِ فجر کے وقت سیکیورٹی انتظامات کا تفصیلی جائزہ لیا۔ اس موقع پر متعلقہ پولیس افسران بھی ان کے ہمراہ موجود تھے۔

دورے کے دوران ہلار خان چانڈیو (ایس ڈی پی او کینٹ) نے رمضان المبارک کے سلسلے میں اختیار کیے گئے حفاظتی اقدامات پر بریفنگ دی۔ انہوں نے آگاہ کیا کہ تراویح، سحری، افطار اور فجر کی نماز کے اوقات میں مساجد اور امام بارگاہوں کے اطراف سیکیورٹی مزید مؤثر بنائی گئی ہے، جبکہ گشت کے نظام کو بھی فعال رکھا گیا ہے۔

یہ پڑھیں ماہِ رمضان میں یتیم بچوں کی کفالت بڑھائی جائے، افتخار چوہان

اس موقع پر سعید ملک، ایس ایچ او تھانہ کینٹ اور دیگر افسران بھی موجود تھے۔ حکام کو ہدایت کی گئی کہ وہ اپنے اپنے علاقوں میں باقاعدگی سے ڈیوٹی چیک کریں اور اہلکاروں کو الرٹ رہنے کی تلقین کریں۔

سی پی او ملتان نے گفتگو کرتے ہوئے کہا کہ شہریوں کے جان و مال کے تحفظ کے لیے پولیس تمام دستیاب وسائل استعمال کر رہی ہے۔ ان کا کہنا تھا کہ شہر میں امن و امان برقرار رکھنا اولین ترجیح ہے اور کسی بھی ناخوشگوار واقعے سے نمٹنے کے لیے فورس ہمہ وقت تیار ہے۔