کراچی : ڈسٹرکٹ سٹی کے علاقے میں رات گئے پولیس اور جرائم پیشہ عناصر کے درمیان مقابلہ ہوا، جس کے نتیجے میں بھتہ خوری اور فائرنگ کی متعدد وارداتوں میں ملوث ایک ملزم ہلاک ہوگیا۔
پولیس کے مطابق کھارادر پولیس معمول کے مطابق گشت پر تھی کہ اس دوران لیاری گینگ وار سے تعلق رکھنے والے ملزمان سے سامنا ہوا۔ فائرنگ کے تبادلے میں ایک بھتہ خور مارا گیا، جس کی شناخت شاہزیب کے نام سے ہوئی ہے، جبکہ اس کا ساتھی موقع سے فرار ہونے میں کامیاب ہوگیا۔
مزید پڑھیں: قادرپورراں میں صفائی انتظامات تسلی بخش، شہری مطمئن: فوکل پرسن سُتھرا پنجاب
پولیس کا کہنا ہے کہ ہلاک ہونے والا ملزم لیاری گینگ وار کے جمیل چھانگا گروپ سے وابستہ تھا۔ کارروائی کے دوران ملزم کے قبضے سے بھتہ کی پرچی، ایک موبائل فون اور ایک پستول بمعہ گولیاں برآمد ہوئیں۔
تحقیقات کے مطابق ایک ہفتہ قبل جیلانی سینٹر کے ایک تاجر کو بھتہ طلب کرنے کا پیغام موصول ہوا تھا اور ملزم اسی سلسلے میں بھتہ کی پرچی دینے جا رہا تھا۔ مزید یہ کہ دو ماہ قبل کھارادر میں زیر تعمیر عمارت کے بلڈر کو بھی بھتہ کی پرچی دی گئی تھی اور مزاحمت پر شدید فائرنگ کر کے مزدوروں کو زخمی کیا گیا تھا۔
پولیس کے مطابق ملزم اور اس کے ساتھیوں نے کچھ عرصہ قبل علاقے میں وال چاکنگ بھی کی تھی اور فائرنگ کرتے ہوئے فرار ہوگئے تھے۔
مزید پڑھیں: خواجہ سراؤں کو ساتھ لے جانے پر جھگڑا، فائرنگ میں مارا گیا نوجوان دو روز قبل شادی شدہ تھا
