ملتان(یاسر سلیم) ملتان میں امن اتحاد رکشہ ڈرائیور یونین رجسٹرڈ اور ملتان متحدہ شہری محاذ کے زیر اہتمام رکشہ ڈرائیوروں نے ناجائز چالانوں اور مبینہ زیادتیوں کے خلاف ملتان پریس کلب کے سامنے بھوک ہڑتالی احتجاجی کیمپ قائم کر دیا۔
احتجاجی کیمپ سے خطاب کرتے ہوئے یونین کے صدر مہر ظفر اقبال ہراج، مہر ارشد مجاہد ہراج اور شہریار بھٹہ نے کہا کہ رکشہ ڈرائیوروں کو روٹ وائلیشن کے نام پر تین، تین ہزار روپے کے چالان کیے جا رہے ہیں، جو غریب محنت کشوں کے معاشی قتل کے مترادف ہیں۔ ان کا کہنا تھا کہ جب تک انتظامیہ روٹ پرمٹ جاری نہیں کرتی، اس وقت تک چالان کرنا سراسر ناانصافی ہے۔
مقررین نے مطالبہ کیا کہ رکشہ ڈرائیوروں کے لیے علیحدہ پاسنگ کاؤنٹر قائم کیے جائیں اور تین ویلر رکشوں کے لیے مخصوص پاسنگ پوائنٹس بنائے جائیں تاکہ ڈرائیور قانونی تقاضے آسانی سے پورے کر سکیں اور انتظامیہ کو بھی مشکلات کا سامنا نہ ہو۔
جھگڑے کے بعد شوہر نے اپنی بیوی کو آگ لگا دی، بیٹی بھی متاثر
احتجاجی شرکاء نے الزام عائد کیا کہ پٹرولنگ پولیس کی جانب سے غریب رکشہ ڈرائیوروں کے خلاف ناجائز ایف آئی آرز درج کی جا رہی ہیں، جو قانون کی صریح خلاف ورزی ہے۔ ان کا کہنا تھا کہ روزانہ آٹھ سو روپے کمانے والے ڈرائیور پر تین ہزار روپے کا چالان کسی صورت قابل قبول نہیں۔
