ڈسٹرکٹ بار ساہیوال کو حکومت پنجاب کی جانب سے ایک کروڑ روپے کی گرانٹ
ساہیوال: ڈسٹرکٹ بار ایسوسی ایشن ساہیوال کے لیے ایک خوش آئند اور تاریخی پیش رفت سامنے آئی ہے، جہاں حکومت پنجاب کی جانب سے وکلاء برادری کی فلاح و بہبود اور بار کی ترقی کے لیے ایک کروڑ روپے کا خصوصی چیک فراہم کیا گیا۔ یہ چیک صدر ڈسٹرکٹ بار ایسوسی ایشن ساہیوال ملک سعید احمد سگلہ ایڈووکیٹ ہائی کورٹ اور جنرل سیکرٹری میاں طارق کمیانہ ایڈووکیٹ نے صوبائی وزیرِ قانون رانا محمد اقبال سے وصول کیا۔
اس موقع پر بار قیادت نے اس مالی معاونت کو وکلاء برادری کے لیے ایک اہم سنگِ میل قرار دیتے ہوئے کہا کہ یہ گرانٹ نہ صرف بار کے بنیادی ڈھانچے کی بہتری میں مددگار ثابت ہوگی بلکہ وکلاء کو درپیش مختلف مسائل کے حل اور ان کی پیشہ ورانہ سہولیات میں اضافے کا باعث بھی بنے گی۔ انہوں نے کہا کہ موجودہ بار قیادت نے اپنے انتخاب کے دوران وکلاء سے جو وعدے کیے تھے، ان کی عملی تکمیل کے لیے مسلسل جدوجہد جاری رکھی گئی، اور یہ کامیابی اسی محنت، خلوص اور سنجیدہ کوششوں کا نتیجہ ہے۔
صدر ڈسٹرکٹ بار ساہیوال ملک سعید احمد سگلہ ایڈووکیٹ ہائی کورٹ نے کہا کہ وکلاء کسی بھی معاشرے میں انصاف کی فراہمی اور قانون کی بالادستی کے لیے بنیادی کردار ادا کرتے ہیں، اس لیے ان کی فلاح و بہبود اور پیشہ ورانہ ضروریات کا خیال رکھنا نہایت ضروری ہے۔ انہوں نے اس گرانٹ کے حصول پر صوبائی وزیرِ قانون رانا محمد اقبال کا خصوصی شکریہ ادا کرتے ہوئے کہا کہ انہوں نے ہمیشہ ڈسٹرکٹ بار ساہیوال کے مسائل کو ترجیحی بنیادوں پر سنا اور ان کے حل کے لیے بھرپور تعاون فراہم کیا۔
یہ پڑھیں کراچی سمیت ملک بھر میں بجلی مہنگی: عوام پر اربوں روپے کا نیا بوجھ ڈال دیا گیا
جنرل سیکرٹری میاں طارق کمیانہ ایڈووکیٹ نے بھی اپنے خیالات کا اظہار کرتے ہوئے کہا کہ حکومت پنجاب کی جانب سے فراہم کردہ یہ مالی معاونت بار کی ترقی، وکلاء کی سہولتوں میں اضافے اور مختلف فلاحی منصوبوں کی تکمیل میں اہم کردار ادا کرے گی۔ انہوں نے کہا کہ بار کی موجودہ قیادت وکلاء کے اعتماد پر پورا اترنے کے لیے دن رات کوشاں ہے اور مستقبل میں بھی وکلاء کے حقوق، تحفظ اور پیشہ ورانہ بہتری کے لیے اپنی جدوجہد جاری رکھے گی۔
بار عہدیداران نے اس موقع پر وکلاء برادری کا شکریہ ادا کرتے ہوئے کہا کہ ان کا اعتماد، تعاون اور حوصلہ افزائی ہی ان کی اصل طاقت ہے۔ انہوں نے اس عزم کا اظہار کیا کہ ڈسٹرکٹ بار ایسوسی ایشن ساہیوال کو ایک مضبوط، فعال اور مثالی ادارہ بنانے کے لیے تمام ممکنہ اقدامات کیے جائیں گے تاکہ وکلاء کو بہتر ماحول اور جدید سہولیات میسر آ سکیں۔
قانونی حلقوں کے مطابق حکومت پنجاب کی جانب سے دی جانے والی یہ گرانٹ ڈسٹرکٹ بار ساہیوال کی ترقی اور وکلاء کی فلاح کے لیے ایک مثبت قدم ہے، جس کے دور رس نتائج مستقبل میں نمایاں طور پر سامنے آئیں گے۔ اس اقدام کو وکلاء برادری نے خوش آئند قرار دیتے ہوئے امید ظاہر کی ہے کہ آئندہ بھی بار اور وکلاء کے مسائل کے حل کے لیے اسی طرح تعاون جاری رکھا جائے گا۔
