پاکستان میں پیٹرول کی قیمت سال 2026 کے آغاز سے اب تک 145 روپے 13 پیسے فی لیٹر بڑھ چکی ہے، جبکہ ہائی اسپیڈ ڈیزل 139 روپے 16 پیسے فی لیٹر مہنگا ہو چکا ہے۔ ایندھن کی بڑھتی قیمتوں نے گھریلو اور ٹرانسپورٹ اخراجات پر دباؤ مزید بڑھا دیا ہے۔
سال کے آغاز میں پیٹرول 253 روپے 17 پیسے فی لیٹر اور ڈیزل 257 روپے 8 پیسے فی لیٹر تھا۔ 10 اکتوبر تک پیٹرول کی قیمت 398 روپے 30 پیسے اور ڈیزل کی قیمت 396 روپے 24 پیسے فی لیٹر تک پہنچ چکی تھی۔
حکومت نے 21 جولائی 2026 کو عالمی منڈی کے نرخوں کی بنیاد پر روزانہ قیمتوں کے تعین کا نظام متعارف کرایا تھا، جس کے بعد سے قیمتوں میں بار بار ردوبدل ہوتا رہا ہے۔
یہ پڑھیں حکومت کا پیٹرول کی قیمت بڑھانے اور ڈیزل سستا کرنے کا اعلان، 6 اکتوبر سے نئے ریٹ نافذ
21 جولائی سے 10 اکتوبر کے درمیان پیٹرول کی قیمت 35 مرتبہ بڑھی اور 22 مرتبہ کم ہوئی۔ اسی عرصے میں ڈیزل کی قیمت 34 مرتبہ بڑھی اور 23 مرتبہ کم ہوئی۔
دونوں ایندھن سال کے دوران اس سے بھی زیادہ بلند سطح پر جا چکے ہیں۔ 3 اپریل کو پیٹرول کی قیمت 458 روپے 41 پیسے فی لیٹر کی بلند ترین سطح پر پہنچی، جبکہ ڈیزل 520 روپے 35 پیسے فی لیٹر تک چلا گیا تھا۔
دوسری جانب حکومت کی پیٹرولیم لیوی کی وصولی جولائی 2025 سے اپریل 2026 کے درمیان تقریباً 1.342 ٹریلین روپے تک پہنچ گئی۔ جولائی 2025 سے مارچ 2026 تک یہ وصولی تقریباً 1.205 ٹریلین روپے تھی۔
حکومت نے مالی سال 2026-27 کے لیے پیٹرولیم لیوی کی وصولی کا ہدف تقریباً 1.676 ٹریلین روپے مقرر کیا ہے۔
